Am Dsischti, 19. Juli, simer zmitts ir Nacht vorder Gränzä abgladä wordä u gägä morgä sobaud si isch ufgangä überä gloffä nach Laos. Dert simer mitemnä Bus witer id Houptstadt Vientiane inä. Zersch heimer üs mau chli vo därä längä mehrtägigä Fahrt erhout. Zu üsärä Überraschig hets a jedem Eggä Baguettes u ganz feins Ässä ka u ou süsch isches absolut französisch aghucht – das isch dr wahnsinn gsi! 🙂 Am nächschtä Tag isches de oscho widr witer miter nächschtä über 10 Stündigä, ender houprigä u kurvigä Fahrt nach Luang Prabang. Ä risä Überraschig het’s am nächschtä Abä gä, wo plötzlech d’Olivia früächer aus erwartet vorder Türä isch gstangä. Si isch vo Vietnam här übärä nach Laos greist (damer äbä nid uf Vietnam hei chönnä ireisä) u mit üs zämä greist bis Ändi Monet Juli. Vo Luang Prabang simer de z’Dritt abä, via Vientiane numau, nach Thakhek u Don Det/4000 Inslänä greist. Bevors witer nach Kambodscha und zum Angkor Tämpu isch gangä.
Luang Prabang
In Luang Prabang het’s viu schöni Tämplä, gnaz feins Ässä o da widr, viu Massagä-Möglechkeitänä u isch süsch o äs gnaz härzigs Örtli.
Thakhek / «Loop»
In Thakhek acho, heimernis am nächschtä Tag für zwöi Täg aui je äs Töffli gschanppet u si ds Dritt losgheitzt u hei dr Loop gmacht (blau Kreis obä ufder Chartä).
Dr Loop isch ä schöni Töff-Strecki (ca. 300-400 km läng) u füährt dr wunderschöni z.T. kurvägäri u weniger kurvägi u hügälägi Landschaftä.
Ungfähr ider Mitti bidä Kong Lor Höhlinä heimer d’Nacht verbracht u am nächschtä morgä aus erscht’s d’Höhlinä agluegt, bevormer dr 2. (westlech) Teil vom Loop zrüg nach Thakhek si gfahrä.
Dür di Kilometerlängi Höhli geit ä Fluss derdür u mir si mitemnä Bötli einisch derdür u widr retour, was insgesamt guet 2-3 Stungä het duret.
Das uf däm Bötli isch eher ä gwagglägi Agglägäheit gsi u da darf natürlech d’Sicherheit oh nid fählä 😉
So het’s am anger Ändi vor Höhli/Fluss usgseh:
U das isch üsä Käpten gsi:
witer isches ufem Loop mit üsärä chlinä Töffli-Gäng zrügg nach Thakhek.
Don Det / «4000 Inslänä»
Nach Don Det simer widr mit Bussä underä Fähri. Dert isch dr Fluss wahnsinnig breit u ir Rägäzit biudesech extrem viu chlini Inslänä. Zuedäm ischs Wasser rächt bruun, wiemä gseht 🙂
Ds laotischä Bier «beerlao» isch ou stets üsä tröi Begleiter u fein gsi.
