Malaysia teiltsech bi üsärä Reis i 2 Teili. Vom 10. bis 18. Mai simer nachdä Philippinä ufem malaysischä Teil uf Borneo in Kota Kinabalu & Mount Kinabalu gsi u nach Ouschtraliä vom 8. bis 16. Juli simer in Kuala Lumpur udä Cameron Highlands gsi, beovrs de witer dür Thailand ufä nach Laos gangä isch.
Üses Ziu in Kota Kinabalu isch ganz klar gsi, irgendwiä ufä Mount Kinabalu (mit 4095 Meter über Meer, einä vodä höchschtä Bärgä in Südoschtasiä) ufäz’cho. Das isch aber nid ganz äso eifach gsi, wöumä das ganzä nur ihrä mehrtägigä arrangiertä Tour het chönnä machä. Mir hei de vor Ort nu äs Plätzli fürd d’Wuch druf gfungä u hei diä Zyt grad gäbig chönnä nützä zum üs druf vorz’bereitä.
Kota Kinabalu / Zoo
So simer zum Bispiu ou ga dr Zoo aluegä, wöu de ä ganzi Wuche scho gnue Zyt isch 🙂
Ä schöni Moschee heimer o nu gfungä.
Mount Kinabalu (4095 M.)
Am erschtä Abä heimer bim Parkigang unger am Bärg übernachtet u ä chlini Wanderig zumnä Wasserfau dürä Dschungu gmacht ka.
Am nächschtä Tag (theoretisch chöntmä dä vordran ou wägla, wöumer ja denn immernu ersch geng bim Parkigang u unger am Bärg si gsi) isches de stundälang z’düruf. Gägä Mittag/früächä Nami simer bim Laban Rata Resthouse uf 3’273 Meter acho. Dert heimer z’Ässä becho u chönnä schlafä bis am morgä am 3.
U denn isches de vo dert nu dr Räscht ufä gangä zmitts ir Nacht bis zum Gipfu (4’095 Meter), womer dr Sunnäufgang hei chönnä gniessä
Das dahiä isch dr höchscht Punkt gsi, womer ufä si
Ude simer widrum abä zur Hüttä ga z’mörgälä u de grad ganz abägloffä bis zum Mittag härä. Insegesamt ä supertollä u würklech einzigartigä Usflug gsi. Dr einzig Nachteil isch, dassmä relativ viu derfür zauht, wöus nur imnä arrangiertä Agebot überd Hoteuchetti vom Resthouse möglech isch, wöusi ds Monopou dert obä hei…
Kuala Lumpur
Zum 2. Mau in Malaysia, aber dasmau nid wieder Borneo, simer am Friti 8. Juli in Kuala Lumpur zrügg vo Ouschtraliä acho. In Kuala Lumpur heimernis nach drü Wuchä verchrüppletem Camper in Ouschtraliä ä chli Luxus imnä wahnsinns Appartment gönnt us eifach paar Täg gnossä mau fasch widr chli deheimä z’si!
Mitärä vouusgstattetä Chuchi het äs säubergmachts Schoggimousse nid dörfä fählä.
Grad so ganz gar nüt heimer scho nid gmacht u jedä Tag heimernis für paar Stündli usätrout u si paar Eggänä vo KL ga aluegä.
Batu Caves:
Petronas Twin Towers (KLCC):
KL Bird Park:
Aus nächschts vo Kuala Lumpur isches witer mitem Bus zudä Cameron Highlands im Nordä obä.
Cameron Highlands
Dert heimer 3 Täg schöni Wanderigä dürä Dschungu, d’Bärgä u d’Teeplantagänä ungernu u di chüähli Bärgluft gnossä.
Witer vodä Cameron Highlands bzw. bvo Malaysia isch de am Samschti 16. Juli mitemnä grössärä ÖV Marathon, wöumer üsä Flüger uf Vietnam nid hei chönnä nä. Ds Ziu isch nöi Laos u ohni Flüger wordä. U de simer mitem Bus zrügg nach KL, vo dert mitmä Nachtbus nach Hatyai in Thailand, dert wiederum am Sunti Nami ä Zug nach Bangkok, womer am Mänti Vormittag si acho u gägä Abä über d’Nacht mehräri Büs nach Vientiane in Laos hei gnu.