Manila City & Luzon (Philippinä)

Witer vo Coron/Busuanga Island simer mitmä riisigä Passagierschiff, wo üs diräkt nach Manila City het bracht. Nach guet 16 Stung Fahrt über Nacht umänä wunderschönä Sunnäungergang, simer de ir gröschtä Metropolä vodä Philippinä (mit über 12 Mio. Iwohner u i 16 Städt ungerteilt) acho.

Manila City

In Manila het üs aus 1. vorauem diä Tanksteu fasziniert u ganz klar fotowürdig dünkt, nid?!

Gli drufabä heimer de ou dänkt, dassmer einä vodänä X Küderhüfä u Stink-Abwasserflüss sött festhautä. Leider a fasch jedem Eggä chum z’übersehä.

Zimlech gli mau heimer üs de ou ufd Suechi nachem chinesischä Fridhof gmacht. Ä risägi Alag mit sehr sehr idrücklächä Greber. Vorauem wemä bedänkt wiä luxuriös di Verstorbnigä i dänä risigä u schickä Hüser z.T. sogar mit Badzimmer, Chuchi, Strom & Wasser u sogar mit Ässä loggierä u das när mitä Blächhüttli vodä Lebändigä usserhaub vom Fridhof verglicht.

Di meischtä Greber si 2 Stöckig u hei ä Zun drumum.

Ganz viu Strassänä verbindä d’Greber u äs isch so gross, dass viu o mitem Velo oder Outo dr Fridhof gö ga aluegä.

Am Abä heimer dr Usblick uf di ungerschidlächä Skylines vodä verschidnigä Städt ir Stadt gnossä.

Baler

Nach paar Täg Manila City heimers de chli gseh ka, üs äs Outo gschnappt u si ufä nach Baler düset. Dert heimer ändlech mau widr ä Rundi chönnä surfä u üs glichzitig uf üsä philippinisch Abschluss Marathon mit meh aus 1’500km Outofahrt i nur 7 Täg uf philippinischä (!) Strassänä begäh.

Risterassänä im Nordä

Nach paar Täg surfä simer witer zudä Risterassänä vo Banaue, Pontiac u süsch verschidnigä ufem Wäg. D’Terassänä vo Banaue si über 2’000 Jahr aut u körä zum UNESCO Weltkulturerbe.

Wasmer näbs immer wieder mau kaputtä Strassä o nu hei atroffä, si Strommaschtä wo zmit’s id Strass si pflaschteret wordä – oder villech isch o d’Strass um’d Pföschtä bout wordä?.

Kabayan

Witer simer nach Kabayan, wosech ou idä Bärgä vo Nordluzon befindet. Dert heimer ä Tageswanderig zudä Mummiä ufmä Bärg, guet 1’000 Meter witer obä, ungerno.

Mit ou super Usblickä uf Risterassänä:

Und ämnä Hammer-Usblick obä ufem Bärg.

D’Mummiänä si dennzumau vor X-Jahr i Houzchischtänä mit Tüächer igwicklet obä ufem Bärg i mehrärnä chlinä Höhlinä ufbewahrt wordä. Dank äm Klima (vorauem Temperaturä) u dä Gegäbäheitä, sigäsi hützutags nu so guet erhautä blibä.

Ä grussligä Ablick!

Dr Vorderscht hiä, sig ihri «peferct mummy» – wägä dä guet erhautnigä u erkennbarä Tattoos adä Schinbei u Armä:

Ein Baby… oh wie süss!

Widr zrügg im Dorf heimer de zum Abschluss nu chönnä ga zimlech viu Totächöpf irä Höhli im Dorf aluegä. Leider heimer derzue nid viu meh Infos becho, aus dass si ou öppä us därä Zyt wiä d’Mummiänä sigä.

on the road

U immer wiedermau chli äs Ghetto ufdä Strassä u viu Stou.

Da hetmä ou mau schnäu hurti Zyt fürnes Foto z’posierä

U lu ou da plötzlech ischmä sogar z’Mexiko!

Da derzue körtsech natürlech ä Klassiker!

Vigan City

Vo Ägyptä, über Mexiko u plötzlech in Spaniä – d’Philippiner si äbä viuväutig!

Paoay

Di 1. vo 2 schönä Barockchilänä ar Nordweschtküschtä in Luzon. Insgesamt si 4 idä Philippinä verteilt u körä zum UNESCO.

U derzwüschä hets nu ä chlinä Abstächer id Sahara gä – äbä di philippinäschi Viufaut.

und Nr. 2 – Sta. Maria Church

 

So schnäu si de o di 2 Mönet ufdä Philippinä dürä gsi u üses 59-tages Visa vou u ganz usgreitzt. Mir hei di Zyt extrem gnossä u chöi das Land mit sinä viunä Inslänä u därä Hammer Viufaut u vorauem dr Fründlechkeit u Offäheit vodä Philippiner jedäm nummä witerempfählä – egau wiä läng oder churz mä Feriä het! 😀

 

Itz geit’s witer ab uf Borneo aus 1. nach Kota Kinabalu zum Mount Kinabalu.