Nach Siuvester am 1. Tag im Nöiä Jahr acho imnä nöiä Land u emnä nöiä Kontinänt, isches numä nu 1 Nacht gangä u när isch höchä Bsuech usder Schwiz am morgä früäh oscho in Lima in Peru gstangä – Linda! U dr ganz Januar u glichzitig mi letst Reisemonet heimer zämä chönnä verbringä u dür Südamerika reisä und erläbä. Plant im Vorfäud heimer nid viu, vorgseh heimer ka irgendwiä quer dür Südamerika uf Brasiliä z’cho u de Rio de Janeiro aus letsti Station i’zbouä. In Peru isches aus erschts ar Küschtä Abä nach Paracas zudä Islas Ballestas witer nach Ica/Huacachina, Arequipa, Canon del Colca, Cusco, Ollantaytambo, Machu Picchu u de widr retour nach Cusco u vo dert a Titicacasee, wo’s witer nach Boliviä gangä isch. Nach paar Täg heimer rächt schnäu usägfungä dasmer ufem «Gringo-Trail» glandet si u eigentlech genau (oder ämu meh oder weniger ä so) das dr klassisch Touri-Wäg dür Peru isch. 🙂 Peru het üs u guet gfauä, isch aber houptsächlech sehr wit obä idä Bärgä u mä bewegt sech meistens so uf 3’000 bis 4’000 Meter ü.M., ja ab und zue sogar uf 5’000 oder wes de mau abä geit ischmä «numä nu» uf 2’500 Meter! Chaut isches dämentsprächend ou meistens u im Januar git’s gnueg Rägä..
Lima
What a surprise – swiss cheese, swiss chocolate and swiss bread! Unes Peruanischs-Willkommensbier zum Zmorgä, was fürnä herrlechä morgä vom 2. Janaur 🙂
Dasdahiä isch Lima
Hiä isch d’Usicht vom Mirador «San Cristobal» mit Sicht über ganz viu vo Lima – riesig!!
Islas Ballestas
Mitemnä Bus simer witer nach Paracas u vo dert zudä Islas Ballestas gstartet. Leider isch am morgä früeh aues nu so zimlech im Näbu ideckt gsi. Ganz viu Vögu, Pinguinä u Seelöiä heimer aber trotzdäm gseh. Mä seit ou dass das d’Galapagos Inslä im Chliformat sig.
«I bi nä Stei!» genau das probiere si schinbar z’si, wesi närvös wärdä wemä nöch asä härä chunnt. Lustig das Seelöiä rächti Schwierigkeitä hei sech würklech ganz ruhig stiu z’hautä u si rächt schwankä – herrlech.
Ica (406 M.ü.M.)
In Ica simer ufnä Wii-Degustationstour zu 2 verschidnigä Güeter.
Usägsteut hetsechs de aus 1 Pisco u 1 Wii Degustations-Ort
U wos los isch gangä vo links nach rächts einisch quer dürs Pisco-Sortimänt zack zack zack shot shot shot u de nu witer zum Wiiguet.. ja de hets de o ke witäri Fotos me gä, villech ou besser so 🙂
Huacachina (404 M.ü.M.)
Selfies… wo scho nid?!
ja da heimer natürlech ou mitgmacht u di zwöi bestä us dr me aus 1’000igä Uswauh sorgfäutig usgwäuht.
Das isch ganz Huacachina, nid meh. Wienä chlini Oasä zmit’s idä Sanddünä din.
Arequipa (2’328 M.ü.M.)
Canon del Colca (Chivay 3’635 M.ü.M.)
Dr Wäg vo Arequipa nach Chivay bim Canon del Colca geit übernä 4’910 M.ü.M. höchä Pass u Chivay säuber isch o rächt höch obä. Womer si acho bzw. scho ufder Strecki isches ar Linda nümä 100% guet gangä wägder Höhächrankheit. Nach paar Täg, viu Schlaf, wenig Asträngig u viu Coca-Täfäli/-Teelis isches de aber zum Glück besser gangä. Was guet isch gsi fürdi bevorstehendä Ortä, wöumä nid grad so schnäu usem Andägebirge widr dussä isch.
