Mit jewius ämnä Nachtzug hanis vo Chengdu nach Kunming u vo Kunming nach Lao Cai adi vietnameseschi Gränzä im Nordä obä gschafft. Wahnsinnig fründlech ischme bir Ireis ufder vietnamesische Sitä nid empfangä wordä – anstatt dasses ä Stämpu het gä, ischmä wiä Dräck behandlet wordä u zwüschä 2 Schauterä hin u här gschickt wordä. Nachemnä Wili (u das Spili sicher fasch ä Stung) isch de mau einä minä u d’Päss vo zwe angernä Turischtä cho aluegä u damer au ke Amis si (ischmer speter erklärt wordä), het’s plötzlech äs änd gnu u i ha ganz normau dörfä ireisä. Aus erschts bini wiä gwohnt zumnä Gäutoutomat u aus nächschts hanimer ä Bus nach Bac Ha gschnappet. Chum igreist hetsechs sofort wieder wiä i angernä südoschtasiatischä Länder agfüeuht – hami fasch ä chli wiä wieder «deheimä» gfüeuht, da China u ou di angerä nördlechä Länder Kulturell scho sehr angers si gsi. Zu däm Zytpunkt hanimi wahnsinnig uf nu aues bevorstehendä vo Vietnam gfröit u umso meh wonimer in Ha Giang äs Töffli ha kouft u definitiv frei u unabhängig ha chönnä los abä i Südä düsä. Mini Route in Vietnam isch dämentsprächend eifach gsi u het vo obä bis abä i Südä um HCMC/Saigon gfüehrt – fasch aues mit mim Yamaha Nouvo Schlittä. 🙂
Bac Ha
In Bac Ha hani nid viu meh aus das spezieuä Schlössli da gfungä ka u mi churzdrufabä entschlossä scho am nächschtä Tag witer nach Ha Long z’ga. Am nächschtä Tag hani de ä Bus nach Ha Giang gseh u de dä gnu, wöumer dr Nordä vomnä Saigoner/HCM-inlianer (ämänä Fründ us Saigon/HCMC) wermschtens empfohlä wordä isch – hani speter ou überhoupts nid beröit.
Ha Giang & Loop (Tam Son, Yen Minh, Dong Van, Meo Vac)
In Ha Giang acho, het’s aus erschts gheissä shopä u zwar äs Töffli 🙂 Mit däm hanimi de ou Grad ufä Wäg gmacht dr Nordä imnä Mehrtägigä-Rundfährtli (Ha Giang, Tam Son, Yen Minh, Dong Van, Meo Vac, Ha Giang. isch ou obä ufder Chartä ersichtlech) z’erkundä u nachdäm bis z’ungerscht i Südä abä z’bräterä oder haut dedert womi nöi Amigo dr Geischt ufgit.
Ha Long & Quan Lan
Vo Ha Giang nach Ha Long hani guet 2 Täg brucht u bi paar Täg mitmä Schiff überä ufd Inslä Quan Lan ga usspannä. Das isch ä chli di nid standardisierti Form vor Halong-Bucht, isch aber absolut Wärt gsi d’Halong-Bucht äs bitzeli ufnä angeri Art u Wies z’gseh.
d’Inslä säuber isch nid würklech gross u het viu Strand…
… leider rächt oft mit Küder übersäit. 🙁
Widr mitem Schiff retour nach Ha Long, hani mini Töffli-Reis fortgsetzt u bi nach Nam Dinh gflitzt. Wärum Nam Dinh? Ja wöui scho fasch widr chli gnue ha ka vom stundelang ufem Töff z’hockä umer z’Füdlä oscho bitzli het weh ta. Därum hani dert mis Töffli u mi ufnä Zug nach Hue verfrachtet umer so guet 600KM (wo lut Vietnamesä nid lohnenswärt sigä) Töffli-hockä erspart u ä vietnamesäschi Zugfahrt gnossä.
