Weschtküschtä (Taiwan) – Wäutreis.ch – Jonas & Simon Inderkummen 2016

In Taiwan bini in Taipei acho u hamer aus erschts paar Täg Zyt gnu für Taipei. Au zu lang hani dert aber nid wöuä blibä, wöu ou das ä ganz normali asiatischi Stadt isch u nid öppis wahnsinnig spezieus. öppis plant hani nid würklech ka, derfür ganz viu Ideeä wo dasi überau härä chönnt u wett. E Abstächer nach Okinawa/Ishigaki hetsech leider de vor Ort erübrigt, wöus diä Fähri vo Keelung (Taiwan) dert überä nümme git. Mini nächschti Idee isch de gsi dassi nach guet 3 Täg Taipei am Sunti mitemnä Velo vo Giant (wosi ufder ganzä Inslä düe vermietä) mi uuf miech 2 Wuchä d’Oschtküschtä abä z’radlä. Das hätti ou aues klappet, woni aber am Sunti im Ladä vorem Velo gstangä bi, hani leider müesse churzfristig das ganzä abbrächä – wasi di nächschtä Täg de ou nid beröit ha. I ha beschlossä zersch d’Weschtküschtä mitem öv abä z’tukerlä u vom Südä här dr Oschtä zrügg ufä nach Taipei z’cho. Dr Grund für mi Planwächsu isch dr Typhoon Megi gsi, wo vom Oschtä här di nächschtä Täg über ganz Taiwan drüber gfätzt u de witer nach China isch. Woni das Spektaku am Dischti in Taichung erläbt ha, hani nid schlächt gstuunet wie heftig das isch u wemä bedänkt dasses ar Oschtküschtä bimnä Typhoon nu heftiger isch, bini ganz froh gsi nid ufem Velo z’sitzä u im Weschtä vor Inslä z’si. 🙂

Taipei

Jiufen (Usflug vo Taipei us)

Steuder mau vor sonä Ussicht z’ha, wedä s’Fänschter ufmachsch – wahnsinnig! 🙂

Yehliu (Usflug vo Taipei us)

Taichung

Witer isches äbä de am Sunti mitem Schnäuzug, wo mit knapp 300 km/h d’Weschtküschtä abäflitzt, nach Taichung.

Dert hani nu grad bitzeli schöns Wätter verwütscht ka woni bi acho u d’Glägäheit gnützt ds Rainbow Village a’zluege.

När isch de gar nütme gangä u ou keni Züg etc. gfahre bis u mit Midwuch mittag. Denn bini widr mitem Schnäuzug witer nach Kaohsiung.

Kaohsiung

Fo Guang Shan

Disä Tämpu isch absolut empfählenswärt – verbindet chineseschi mit japanischer u sogar indischer Architektur, isch riesig, u äs het erstunlech wenig lüt dert!