änet dr Gränzä acho in Copa(cabana) in Boliviä isches losgangä mit Plän schmidä u zu Infos z’cho wiemer wouh am schneuschtä irgendwiä ad Oschtküschtä as Meer chömä – gneuer uf Buenos Aires in Argentiniä! Schritt 1 isch ä Bus uf La Paz id Houptstadt vo Boliviä gsi, dert acho im Bus-Terminal isch ds Chaos vo x-tusig Busungernähmä, Fahrplän, Prisä u Abfahrtszytä losgangä. A däm Abä öppä am haubi 9i isches aber relativ eifach gsi da dr letst Bus am 8i losgfahre isch u de simer zersch mau ines Hotel ä Nacht ga übernachtä. Für am nächschtä Tag heimer ä diräkt Bus gfungä wo mit guet 48-50h Fahrt am 1 am Nami abfahrt. Leider zu üserä Enttüschig simer zersch mau paar Stung mit «Verspätig» verströschtet wordä, öppe gägs di 6e am Abä anes angeres Terminal bracht wordä mitem Taxi u dert hets de nachemnä wili gheissä dass dr Bus morn de ersch fahrt. Widr zrügg am vorhärigä Terminal wenig speter erneut mitem Taxi acho, heimer grad nu schüst ä Bus am 7i nach Tarija im Süde vo Bolivia verwütscht. Somit wärs klar gsi dases itz ufne chline Marathon mit viu verschidnä Büs etc. uselouft. Vo Tarija simer mitem Taxi ad Gränzä, vo dert mitemnä angerä argentinischä Taxi uf Oran u i däm Ortli heimer scho nach 1-2 Stungn ä Bus uf Buenos Aires (24h, effektiv 29h Fahrt) verwütscht. Auso het doch aus nu irgendwiä klappet u mir hei gar ni so viu lenger ka.
In Buenos Aires simer paar Täg blibä, hei dr Geburtstag vor Linda gfiiret (zum Glück nid imnä Bus uf hauber Strecki 😉 ) u witer nach Iguazu zudä Wasserfäu. Gigantischbumbastischriesägi Wasserfäu si das, würklech schöni!
Quer dür Boliviä
Buenos Aires
Wasserfäu Iguazu
