Et voilà itz chömemer nu zum 3. u letstä Teil vo Vietnam – dr warm Südä. Vietnam het so viu z’gseh u erläbä ka u vorauem mitem Töffli ischme ganz viuem verbi cho u dämentsprächend hets ou massiv me Fötäli gä aus viunä angerä Ortä/Länder. Vo Nha Trang bini am nächschte Morge witer richtig Mui Ne. Dert heimi d’Sand-Dünänä sehr positiv überrascht u imponiert. Mui Ne säuber hetmi dr Strand u di ganze Touris nid überzügt. Strand isch dert vo mir us gseh sowieso nid di richtegi bezeichnig, wöus Wasser bis ad Promenade-Steiwäng härä schwemmt umä somit gar nid im Sand ligä cha. Aber äs git ja gnue angeri verlassnägi Stränd in Vietnam, womä Zyt am Strand u nid Hoteu-Pool verbringä muess – wemä ja scho äs meer het 🙂 Nach Mui Ne hanimi uf zum Yamaha Mech gmacht, wöu mis Flitzerli sitä letstä paar Hundert Kilometer komäschi Grüsch vosech git. Di ernüächterndi Nachricht isch de ou gsi, dass dr Motor nechschtens dr Geischt ufgit (kes wunder, d’Kilometerazeig, isch irgendwo bi 37’000km umä blibä sta u wär weiss wie vius effektiv si…). Dämentsprächend hani beschlossä nümm zviu äxtra Kilometer z’machä u bi witer uf Ho Chi Minh City (HCMC/Saigon). Nach paar Täg Abgasä u Ghetto isches witer is Mekong Delta u de widr Retour nach HCMC, woni am 27. Novämber, nach 3.5 Wuchä, Vietnam ha verlah.
Dasda hani irgendwo ufder Strecki nach Mui Ne atroffä, völlig unerwartet u leider aber ou diräkt näbsder AH1-Vierspurigä-Strass mit viu Verchehr. Ds wunderprächtigä Wätter het’s derfür widr guet gmacht. 🙂
Ou da (irgendwo) mau widr unzählägi Schiffli imnä Dörfli ar Küschtä.
Mui Ne
Zersch oberhaub, villech so 10km, vor Mui Ne hani wissi Sand-Dünänä gfungä.
öppä ä Viertustung speter, bini is Dörfli Mui Ne inä gfahrä. U am Dorfigang vor Polizei aghautä wordä 1’000’000 Dongs z’zahlä. Vo mim agäblechä z’schnäu Fahrä, simer de rächt schnäu dunger uf 600’000 u Fahrä ufder fauschä sitä gsi. Schlussändlech heimer de ä Kompromiss vo 400’000 Dong gmacht ohni vergehä us bir Korruption la blibä. u Schutz für witeri Büessänä hani o nu becho 🙂
Mekong – My Tho
Vo HCMC/Saigon hni uf zum Mekong delta gmacht u mi erscht Stop isch in My Tho.
Mit emnä Tämpu u paar Buddhas…
ärä witerä Chilä im Caodaischä Stiu (Caodaismus, minens Wüssens e Mix vo Buddhismus u Katholizismus und gloubs numä im Mekong-Delta vorhandä), sehr spezieu:
ä chlinä Kanau irgendwo im Mekong , das isch sehr schön und empfählenswärt
Mekong – Cai Be
In Cai Be hani o numau äs Bootsrundfährtli gmacht, das mau si nu 2 Holländer u 2 Schwizerinnä derbi gsi. Dahiä ufem 1. Biud isch e Zwüschestopp ufemnä Früchte-Boot gsi. Sones Boot isch äs Tröimli fürmi u äs het eifach jedi Frucht, ja sogar nu ganz viu me ausmer ider Schwiz kennä 😀
äs paar Kilometer witer simer eher ines Industriegebiet cho mit ganz viunä Firmänä wo ihres Materiau über söttägi Bänder vom Schiff as Land bringä oder ou umgekehrt ufs Schiff.
So zwöi lustägi Ougä het fasch jedes Schiff in Vietnam vorä druf.
Im Mekong Delta spiutsech wahnsinnig viu ufem Wasser ab u Wasser/Fluss hets eifach überau. Die 3 Täg hani fasch numä Wasser, Wasser, Fluss u numau Fluss gseh. 🙂
Dasda isch ä Kokosnuss-Süässigkeitä Maschinä, ungernachä wird mit Houz igfüüret, damit aues warm wird u schmiuzt.
E chlini Distellerie wo dr Husgmacht Schnaps härgsteut wird.
Mekong – Chau Doc
In Chau Doc hanimi am Morgä aus erschts uf zum Tra Su Indigo Forest gmacht. Ca. 20 Kilometer vom Stedtli entfernt bini mitem Töffli zum Parkigang cho.
Aus erschts isches mitmä Motorisiertä Langboot losgangä:
Zum Teil hani auso wahnsinnig gstunet womer dürä si, gseht doch eher nacherä Wisä ausemnä See/Gwässer us, nid?!
Hiä ischmä umgstigä ufnes chliners Ruederbötli. U vo da ah isches när uuf i bekannt Waud. Dert isches vouer unzähligä wiudä Vögu gsi. Gloub so viu Vögu u z.T. würklech risägi Cheibä, hani nu niä vorher gseh. Zum würklech es schlaus Foto häräzbecho u einä ufnes Biud z’bringä, bini nid fähig gsi – entweder isch dr Vogu z’schnäu dervo gsi oder zBoot het z’fest gwaggelet.. aber wunderschön ischs gsi zums eifach so gniessä!
Ou das isch aues Wasser:
Nachem Park ufem Rückwäg nach Chau Doc hani ä Stop ufem Sam-Mountain igleit. Vo dert hetmä ä tolli Ussicht u gseht bis übärä nach Kambodscha.
Ho Chi Minh City (HCMC) / Saigon
Vom Mekong Delta zrügg in HCMC / Saigon bini paar Täg d’Stadt ga erkundä. Aus i auem hanisä nid so wahnsinnig gfungä u vorauem z’Backpacker-Viertu eher hässlech, künstläch und un-vietnamesisch, fasch ä chli wiä ar Kao San in Bangkok/Thailand… Doch git’s ou 2-3 schöni Sachä z’gseh. Paar Fötäli zur Stadt:
Bun Cha (Spezialität us Hanoi) – wirdi definitiv vermissä!
