Woni in Hong Kong dr Pass mitem Visum für China widr idä Häng ha ka, isch für China nütme im Wäg gstange u 2 Täg speter bini oscho in Peking gstangä. Begrüässt wordä bini vo ganz viu Smog u Gstank. ä so viu Smog wie dert hani nu niä erläbt – das isch soo viu dräckägi Luft gsi, dasses het usgseh wiä dräckigä/brunä Näbu wo überau idä Strassä hanget. Sogar idä U-Bahn Stationä ungerem Bodä hetmä ke normau klari Sicht ka. Ehja viu angers hättis o nid erwartet. Witer vo Peking bini mitem Nachtzug nach Shanghai. Dert hani ou paar Nächt verbracht, bevorimi de vodä ganzä Städt, woni ir letster Zyt ha gseh, mau fürnes Wili ha wöuä verabschidä. D’Biuder daderzue si auerdings ersch nu am entstah. 🙂 Drum hiä mau fängs aues zu Peking & Shanghai:
Peking
Summer Palace
Am Samsti hanimer dr Summer Palace bitzli usserhaub vom Zäntrum vorgnu. Mis Highlight für Peking isch natürlech di chinesischi Mur gsi u wöus Wätter ersch am Mänti schön het gmäudet ka hanimer das nu bitzli ufgspart (wassech speter definitiv uszauht ka het).
Dr Summer Palace isch äs risä grosses Aareu u schliesst sogar ä grossä See mit Schiffli i.
Leider isch ou hiä extrem viu Dräck ider Luft gsi u d’Sicht het geng öppä so usgseh:
Palace of Heaven
Ds Programm für am Sunti isch dr nächscht Tämpu gsi u ds Wätter u d’Luft si langsam bitzli besser wordä.
Great Wall Jinshanling
Am Mänti isches de ändlech so wit gsi u i hami ufä Wäg zur chinesischä Mur gmacht. Usgsuecht hanimer dr Abschnitt in Jinshanling. Dä isch nid so dr üblech Teil vor Mur, wöuer witer Wäg vo Peking isch aus angeri. Derfür heter viu weniger Turischtä u isch geng nu im Originauzuestang u nid restouriert wordä. I hami de am morgä früäh ufä Wäg gmacht u bi 2.5 Stung speter acho. äs wunderprächtigs Wätter hani verwütscht u würklech ä perfektä Tag ka. 🙂
Gfüeuht unändlech Wyt, bis a Horizont hets Mur, Mur u numau Mur – wahnsinnig!
Da isch aber de plötzlech fertig gsi u ganz viu Grüens Chrut het gwüätet.
Inä Richtig ohni Muur gseht’s äso us:
U dasda hiä sig schinbar nume in Jinshanling z’gseh.
Peking Äntä
Ja diä wouhbekannti äntä het ou müesse usprobiert si – sehr fein gsi, aber haut ou nid viu angers aus äntä.
Shanghai
Zu Shanghai git’s nid so viu z’sägä – ä risä Metropolä u i ha gfungä wasi phototechnisch scho sit lengerem ha gsuecht 🙂
Lieber Simon wieder einmal bin ich virtuell am mitreisen. Einfach toll! Deine Ausrüstung zur Kamera hat sich definitiv gelohnt. Die Bilder sind so eindrücklich und schön. Kommst du eigentlich noch dazu das alles zu verarbeiten?
Ich hoffe dass es dir gut geht und freue mich auf den nächsten Skype. Feschti Umarmig
schön, dasnech d’Biuder geng nu gfauä 🙂 Ja d’Usrüstig het sech defintiv glohnt u i bi geng nu super happy u zfride dermit – macht Spass! Das mitem Verarbeitä klappt ganz guet, vorauem hiä in China woni immer widr mau ä lengeri Zug- oder mängisch ou Busfahrt vo 12-24 stung ha. U ou süsch hani ja grundsätzlech me aus gnue Zyt dr ganz Tag 😀
Ganz liebi Grüess u bis zum nächschtä Skype gli emau.
Simon
bis uf d’äntänä, die arme sieche, lö dr gring schön la hange
ja diä armä Cheibä… 🙁