>> Hiä geit’s zrügg zum 1. Teil Ouschtraliä
Coober Pedy
Hiä simer inä/es Landschaft/Dörfli cho, wo vou u ganz vo Opal-Minänä prägt isch. Im Dorf säuber git’s viu Attraktionä (Chilänä, Hüser, Bars, Restaurants, etc.) wo ungerirdisch i z.T. autä Minänä bout wordä si.
Hiä ä katholischi Chilä wo vou u Ganz ungerirdisch isch!
Zuedäm fingtmä in Coober Pedy ganz viu auti Kulissänä vo diversä Fiumä.
U witer geit’s Richtig Melbourne mit wiedermau X-Kilometer u ewigs längä Strassä vor üs.
Naracoorte Höhlinä Nationau Park
Disä Nationaupark isch zwüschä Adelaide u Melbourne u kört zum UNESCO. Ä risä grossi Höhli mit diversä Steifromationä wo ewigs läng isch u üs niämaus hät glängt jedä Eggä ga azluegä.
Sogar Cupcakes fingtmä dert.
Witer ufem Wäg richtig Great Ocean Road heimer de oscho di 2. Pannä mit üsem Outo ka – fuel pump oder uf Bärndütsch wahrschinlech öppis wie’s Benzinpümpäli het dr Geist ufgä. Wahrschinlech nid sones super attraktivs Teili, därum heimer ou kes Foto dervo.. Immerhin het’s gratis Kaffi, Güätzi u Tee ir Toyota Garage gä, womer dr ganz Namittag hei verbracht ka.
Great Ocean Road
Irgendwenn heimer de o nu Great Ocean Road grungä (wo gloubs ou zum UNESCO kört) u si am morgä vomnä lebändigä (!!) Kangaroo gweckt wordä – grandios!!
Diä Tierli faszinierä üs i mehrernä Hisichtä bis hüt nu 🙂
U d’Great Ocean Road isch ou dr Hammer gsi. Ä chli äs heftigs Lüftli u chauti Temperaturä, aber ga badä heimer ja ou überhoupts nid vorka (bi dänä Wäuä, Steinä im Wasser u chautä Wassertemperaturä)
The twelve apostles, heimer natürlech onid ussä gla.
U zum Schluss heimer imnä Boum nu freiläbendi Kualas gfungä. Genauso faszinierend wie d’Kangaroos!
Melbourne
Nid gnue becho vodä Tier, simer in Melbourne aus erschts grad i Zoo. Dä Zoo isch so riesig gsi u het so viu verschidnägi Tier ka, das fingtmä öppä nienä ir Schwiz.
Im Stadtzentrum heimer o nu chli Zyt verbracht
u vorauem nach coolä Grafittis usschou ghautä
Blue Montains Nationau Park & Sydney
Aus nächschts isches de leider oscho gli gägä z’Ändi zue u mir heinis via Canberra ufä Wäg nach Sydney gmacht. Dert simer aus erschts richtig Blue Mountain wo üses Outo ufder Outobahn plötzlech di 3. Pannä het bracht u definitiv dr Geist het ufgä. Dr Namittag heimer wiedermau mit Abschleppä u Garagänä verbracht u das defintiv ussichtslos isch gsi, heimer am nächschtä Tag äs Ersatz Outo (leider genau ä glichligä Chrüppu) becho.
Doch nu im Blue Mountains acho, heimer Höhläbemahigä vodä Aborigines vo Früächer u ganz viu Natur numau chönnä bestunä.
Am nächschtä u glichzitig letstä Morgä in Ouschtraliä het ou das Outo nümme richtig wöuä.
Doch nu heimers irgendwiä gschafft in Sydney z’Operä Huss z’gseh u üsä Flüger witer nach Kuala Lumpur (Malaysia) z’verwütschä.
Hallo Jungs
Viellech, aber numme es bitzeli schad heit dr in Australia dr Winter atroffe – wenn ig die Bilder aluege überchum ig ou grad Lust uf das Land, isch sicher hönäh schön gsy! Möchti nam liebschte ou grad cho. U das härzige Känguruh… Bild Nr.5 vom 2. Teil: isch das irgend so nes Weltrumschiff gsi usemene Film? Bild Nr. 5 us Teil 1 find ig ou sehr cool: Der zur Zeit etwas zerknirschte Jonas. Nach de gigantisch grosse Schildkröte, ist das ein Delphin?
Jungs ich find euch toll – zwe Brüetsche wo zämä so grossi Sache dörfe gseh und erlebe isch echt wunderbar
tschüss
Stef
Salü Daddy
Ouschtraliä isch definitiv wunderschön gsi u hetsech totau glohnt. U das mitem Winter isch de o irgendwiä gangä, im Nordä obä isches ja scho o rächt warm u zum Teil sogar heiss gsi! Das Ruumschiff isch usem Fium «Pitch Black», het aber üs beidnä nüt gseit ka.. Biud Nr. 5 vom 1. Teil mussmä sägä isch ou ender früäh am morgä gsi u grad früsch üsem Bett / Outo usgstigä 🙂 Genau das nachder Schiudchrot si zwöi Deuphinä, wosech aber ender vor gmüätlechä Sitä hei zeigt ka u nid z’viu Bewegig.
Liebi Grüäss us Thailand
Jonas u Simon